ನಾನು ತ್ಯಾವರೆಕೊಪ್ಪದ ಲಯನ್ ಅಂಡ್ ಟೈಗರ್ ಸಫಾರಿಗೆ ಅನೇಕ ಸಲ ಭೇಟಿ ಕೊಟ್ಟಿದ್ದೇನೆ. ಅಲ್ಲಿ ತ್ಯಾವರೆಕೊಪ್ಪದ ಆವರಣದೊಳಕ್ಕೆ ಕಾಲಿಡುತ್ತಿದ್ದಂತೆ ಮೈನವಿರೇಳಿಸುವ ಹೂಂಕಾರ ಕೇಳಿಸುತ್ತಿತ್ತು. ಮೈನವಿರೇಳಿಸುವ ಆ ಹೂಂಕಾರ ಹುಲಿಗಳ ಘರ್ಜನೆ ಎಂದು ನನಗೆ ಮೊದಲು ಗೊತ್ತಿರಲಿಲ್ಲ. ಹುಲಿಯ ಘರ್ಜನೆ ಒಮ್ಮೆ ಕೇಳಿದರೆ ಮತ್ತೆಂದೂ ಮರೆಯಲಾಗದಂಥದ್ದು. ಇಂದು ಬದುಕಿರುವ ಬೆಕ್ಕುಗಳಲ್ಲೆಲ್ಲ ಹುಲಿ ಅತ್ಯಂತ ದೊಡ್ಡದು ಮತ್ತು ಅಷ್ಟೇ ಭವ್ಯವಾದ ಪ್ರಾಣಿ. "ಬಿಗ್ ಕ್ಯಾಟ್ಸ್" ಎಂಬ ವಿಶೇಷ ಅಭಿದಾನಕ್ಕೆ ಪಾತ್ರವಾಗಿರುವ ಬೆಕ್ಕುಗಳ ಪೈಕಿ ಹುಲಿಯೂ ಒಂದು. ಹಾಗಾದರೆ ಹುಲಿಯೊಂದೇ ಭೂಮಿಯ ಮೇಲೆ ಘರ್ಜಿಸಬಲ್ಲ ಬೆಕ್ಕೇ ಅಥವಾ ಬೇರೆ ಯಾವುದಾದರೂ ಬೆಕ್ಕಿಗೆ ಘರ್ಜಿಸುವ ಸಾಮರ್ಥ್ಯ ಇದೆಯೇ? ಬಿಗ್ ಕ್ಯಾಟ್ಸ್ ಎಂಬ ವಿಶೇಷಣ ಯಾವ ಬೆಕ್ಕುಗಳಿಗೆ ಅನ್ವಯಿಸುತ್ತದೆ? ಬಿಗ್ ಕ್ಯಾಟ್ಸ್ ಮತ್ತು ಸ್ಮಾಲ್ ಕ್ಯಾಟ್ಸ್ (ದೊಡ್ಡ ಬೆಕ್ಕು ಮತ್ತು ಸಣ್ಣ ಬೆಕ್ಕು) ಇವುಗಳ ನಡುವಿನ ವ್ಯತ್ಯಾಸ ಏನು?
ಸ್ಥೂಲವಾಗಿ ಬೆಕ್ಕುಗಳನ್ನು ಎರಡು ಉಪಕುಟುಂಬಗಳಲ್ಲಿ ವಿಂಗಡಿಸಲಾಗಿದೆ. ಮೊದಲನೆಯದ್ದು ದೊಡ್ಡ ಬೆಕ್ಕುಗಳು ಎಂದು ಕರೆಸಿಕೊಳ್ಳುವ ಉಪಕುಟುಂಬ ಪ್ಯಾಂಥರಿನೇ. ಎರಡನೆಯದ್ದು ಸಣ್ಣ ಬೆಕ್ಕುಗಳ ಉಪಕುಟುಂಬ ಫೆಲಿನೇ. ಮೂರನೆಯದಾಗಿ ಚೀತಾವನ್ನು ಈ ಎರಡೂ ಉಪಕುಟುಂಬಗಳಿಗಿ೦ತ ವಿಭಿನ್ನವಾಗಿರುವುದರಿಂದ ಅದರದ್ದೇ ಆದ ಅಸಿನೋನಿನೇ ಎಂಬ ಉಪಕುಟುಂಬದಲ್ಲಿ ವರ್ಗೀಕರಿಸಲಾಗಿತ್ತು. ಆದರೆ ಕೆಲವು ತಜ್ಞರು ಅವುಗಳನ್ನೂ ಫೆಲಿನೇ ಉಪಕುಟುಂಬದಲ್ಲೇ ವರ್ಗೀಕರಿಸುತ್ತಾರೆ. ಅವುಗಳ ಬಗೆಗಿನ ಗೊಂದಲ ಇನ್ನೂ ಮುಂದುವರೆದಿದೆ. ಇನ್ನು ಈ ದೊಡ್ಡ ಮತ್ತು ಸಣ್ಣ ಬೆಕ್ಕುಗಳೆಂಬ ವರ್ಗೀಕರಣವನ್ನು ಎರಡು ರೀತಿ ಮಾಡುತ್ತಾರೆ. ವೈಜ್ಞಾನಿಕವಾಗಿ ಇವುಗಳ ವರ್ಗೀಕರಣವೇ ಬೇರೆ ಹಾಗೂ ಅವುಗಳ ಗಾತ್ರದ ಆಧಾರದಲ್ಲಿ ಮಾಡುವ ವರ್ಗೀಕರಣವೇ ಬೇರೆ. ಏಕೆಂದರೆ ಗಾತ್ರದಲ್ಲಿ ದೊಡ್ಡದಾಗಿರುವ ಬೆಕ್ಕುಗಳು ದೈಹಿಕ ರಚನೆಯಲ್ಲಿ ಸಣ್ಣ ಬೆಕ್ಕುಗಳಂತಿರುವುದು ಹಾಗೂ ಸಣ್ಣದಾಗಿರುವ ಬೆಕ್ಕುಗಳು ದೊಡ್ಡ ಬೆಕ್ಕುಗಳಂತಿರುವುದು ಕಂಡುಬ೦ದಿದೆ. ಇದರ ಬಗ್ಗೆ ಮುಂದೆ ಹೆಚ್ಚಾಗಿ ತಿಳಿಯೋಣ.
ಒಟ್ಟಿನಲ್ಲಿ ದೊಡ್ಡ ಬೆಕ್ಕುಗಳಿರಲಿ ಅಥವಾ ಸಣ್ಣಬೆಕ್ಕುಗಳಿರಲಿ ಅವುಗಳ ದೇಹರಚನೆಯಲ್ಲಿ ಅನೇಕ ಸಾಮಾನ್ಯ ಅಂಶಗಳಿವೆ. ಎಲ್ಲ ಬೆಕ್ಕುಗಳೂ ಅದ್ಭುತ ಬೇಟೆಗಾರರು ಹಾಗೂ ಬೇಟೆಗೆ ನೆರವಾಗುವಂತೆ ಅವುಗಳ ದೇಹರಚನೆ ಇದೆ. ಒಂದೇ ಮಾತಿನಲ್ಲಿ ಹೇಳಬೇಕೆಂದರೆ ಬೆಕ್ಕುಗಳೆಲ್ಲ ಪ್ರಕೃತಿ ತಯಾರಿಸಿರುವ ಅದ್ಭುತ ಬೇಟೆಯಂತ್ರಗಳು ಎಂದರೆ ತಪ್ಪಾಗಲಾರದು. ಹರಿತವಾದ ಕೋರೆದಾಡೆಗಳು, ಉಕ್ಕಿನ ಹಿಡಿತದ ಉಗುರುಗಳು, ಅತಿಕಡಿಮೆ ಬೆಳಕಿನಲ್ಲೂ ಸ್ಪಷ್ಟವಾಗಿ ಕಾಣಬಲ್ಲ ಅತ್ಯಂತ ತೀಕ್ಷ÷್ಣವಾದ ದೃಷ್ಟಿಶಕ್ತಿ, ಅಷ್ಟೇ ತೀಕ್ಷ÷್ಣವಾದ ಶ್ರವಣಶಕ್ತಿ ಇವು ಎಲ್ಲ ಬೆಕ್ಕುಗಳ ವೈಶಿಷ್ಟö್ಯ. ಅವುಗಳ ಕಣ್ಣಿನಲ್ಲಿರುವ ಟೇಪಿಟಮ್ ಲುಸಿಡಮ್ ಎಂಬ ಪದರದ ಕಾರಣ ಅವುಗಳ ಕಣ್ಣುಗಳು ಕತ್ತಲಿನಲ್ಲಿ ಹೊಳೆಯುತ್ತವೆ. ನಮ್ಮ ಕಣ್ಣಿಗೆ ಏನೂ ಕಾಣದ ಕಾರ್ಗತ್ತಲಿನಲ್ಲಿ ನಕ್ಷತ್ರಗಳ ಬೆಳಕಷ್ಟೇ ಇದ್ದರೂ ಅದರಲ್ಲೇ ಬೆಕ್ಕುಗಳು ಸ್ಪಷ್ಟವಾಗಿ ನೋಡಬಲ್ಲವು. ಅವಕ್ಕೆ ಬಣ್ಣಗಳನ್ನು ಗುರುತಿಸುವ ಶಕ್ತಿ ಇಲ್ಲ. ಆದ್ದರಿಂದ ಅವುಗಳದ್ದು ಕಪ್ಪುಬಿಳುಪು ಪ್ರಪಂಚ. ಇನ್ನು ಅವುಗಳ ಕಿವಿಗಳು ಸಹ ಅಷ್ಟೇ ಸೂಕ್ಷ್ಮ. ಹತ್ತಾರು ಮೀಟರ್ ದೂರದಲ್ಲಿ ಹರಿದ ಕಾಗದದ ಸಪ್ಪಳವನ್ನು ಸಹ ಸ್ಪಷ್ಟವಾಗಿ ಕೇಳಿಸಿಕೊಳ್ಳುವ ಶಕ್ತಿ ಅವಕ್ಕಿದೆ. ಜೊತೆಗೆ ತರಗೆಲೆಗಳ ಮೇಲೆ ನಡೆಯುವಾಗಲೂ ಒಂದಿಷ್ಟೂ ಸದ್ದಾಗದಂತೆ ನಡೆಯುವ ಸಾಮರ್ಥ್ಯ ಇರುವ ಪ್ರಾಣಿಗಳೆಂದರೆ ಬೆಕ್ಕುಗಳು ಮಾತ್ರ. ಬೆಕ್ಕುಗಳು ನಾಯಿಗಳಂತೆ ತುಂಬಾ ದೂರ ಬೇಟೆಯನ್ನು ಅಟ್ಟಿಸಿಕೊಂಡು ಹೋಗಲಾರವಾದ್ದರಿಂದ ಬೇಟೆಗೆ ತಿಳಿಯದಂತೆ ಅದರ ಸಮೀಪ ತೆರಳಲು ಈ ಸಾಮರ್ಥ್ಯ ಅತ್ಯಗತ್ಯ. ಹುಲಿ, ಚಿರತೆಗಳು ತಮ್ಮ ವಾಸಸ್ಥಾನದಲ್ಲಿ ಸುತ್ತಮುತ್ತಲಿನ ಅಡೆತಡೆಗಳನ್ನು ತಮ್ಮ ಅನುಕೂಲಕ್ಕೆ ಬಳಸಿಕೊಂಡು ಅವುಗಳ ನಡುವೆ ಕಣ್ಣಾಮುಚ್ಚಾಲೆ ಆಡುತ್ತ ಬೇಟೆಯನ್ನು ಸಮೀಪಿಸುವ ಕಲೆಗಾರಿಗೆ ನಿಜಕ್ಕೂ ಅದ್ಭುತ.
ಹುಲಿಯ ನಂತರ ಎರಡನೇ ಅತಿದೊಡ್ಡ ಬೆಕ್ಕು ಎಂದು ಹೆಸರಾಗಿರುವುದು ಸಿಂಹ. ಮೂರನೇ ಸ್ಥಾನದಲ್ಲಿರುವುದು ಜಾಗ್ವಾರ್ ಮತ್ತು ಅದರ ನಂತರದ್ದು ಚಿರತೆ. ಇಂದು ಭೂಮಿಯ ಮೇಲೆ ಮೂರು ಕಿಲೋಗ್ರಾಂ ತೂಗುವ ಪುಟಾಣಿ ಮನೆಬೆಕ್ಕಿನಿಂದ ಹಿಡಿದು ಮುನ್ನೂರು ಕಿಲೋಗ್ರಾಂ ತೂಗುವ ದೈತ್ಯ ಸೈಬೀರಿಯನ್ ಹುಲಿಯವರೆಗೆ ಸುಮಾರು ನಲವತ್ತು ಪ್ರಭೇದದ ಬೆಕ್ಕುಗಳಿವೆ. ಆದರೆ ಅವುಗಳಲ್ಲೆಲ್ಲ ಘರ್ಜಿಸುವ ಸಾಮರ್ಥ್ಯ ಇರುವುದು ಈ ನಾಲ್ಕು ಬೆಕ್ಕುಗಳಿಗೆ ಮಾತ್ರ. ಈ ವಿಶಿಷ್ಠ ಸಾಮರ್ಥ್ಯಕ್ಕೆ ಕಾರಣ ಅವುಗಳ ಗಂಟಲಿನ ರಚನೆಯಲ್ಲಿನ ಮಾರ್ಪಾಡುಗಳು ಹಾಗೂ ಅವುಗಳ ಹೈಯಾಯ್ಡ್ ಎಂಬ ಭಾಗದ ಸ್ಥಿತಿಸ್ಥಾಪಕ ಗುಣ. ಹಿಮಚಿರತೆಗೆ (ಸ್ನೋ ಲೆಪರ್ಡ್) ಕೂಡ ಹೈಯಾಯ್ಡ್ನ ಸ್ಥಿತಿಸ್ಥಾಪಕ ಗುಣ ಇದ್ದರೂ ಅದರ ಗಂಟಲಿನ ಇತರ ರಚನೆಗಳು ಘರ್ಜಿಸಲು ಪೂರಕವಾಗಿಲ್ಲ, ಹಾಗಾಗಿ ಅದು ಘರ್ಜಿಸಲಾರದು. ಹಾಗಾಗಿ ದೊಡ್ಡ ಬೆಕ್ಕುಗಳ ಪೈಕಿ ಘರ್ಜಿಸುವ ಸಾಮರ್ಥ್ಯ ಇರುವ ನಾಲ್ಕು ಜಾತಿಗಳೆಂದರೆ ಹುಲಿ, ಸಿಂಹ, ಜಾಗ್ವಾರ್ ಮತ್ತು ಚಿರತೆ ಮಾತ್ರ.
ಈ ದೊಡ್ಡ ಬೆಕ್ಕುಗಳ ಪೈಕಿ ಹುಲಿ, ಸಿಂಹ ಮತ್ತು ಚಿರತೆಗಳು ಸಾಮಾನ್ಯವಾಗಿ ಎಲ್ಲರಿಗೂ ಚಿರಪರಿಚಿತ. ನಮ್ಮ ದೇಶದ ರಾಷ್ಟ್ರೀಯ ಪ್ರಾಣಿ ಎಂದು ಅಂಗೀಕರಿಸಲಾದ ಹುಲಿ ವನ್ಯಜೀವಿ ಸಂರಕ್ಷಣೆಯ ವಿಷಯದಲ್ಲಿ ಪ್ರಥಮ ಕಾಳಜಿ ಪಡೆದ ಪ್ರಾಣಿ ಎಂದರೆ ತಪ್ಪಾಗಲಾರದು. ಬಂಗಾಳದ ಹುಲಿ (ರಾಯಲ್ ಬೆಂಗಾಲ್ ಟೈಗರ್) ಎಂದು ಕರೆಯಲ್ಪಡುವ ನಮ್ಮ ದೇಶದ ಭವ್ಯವಾದ ಹುಲಿಗಳು ಅತ್ಯಂತ ಹೆಚ್ಚಿನ ಜನಸಂಖ್ಯೆಯನ್ನು ಹೊಂದಿದ ಹುಲಿಗಳಾಗಿವೆ. ಇಂದು ಬದುಕಿರುವ ಹುಲಿಗಳಲ್ಲಿ ಸೈಬೀರಿಯನ್ ಹುಲಿ, ಇಂಡೋ-ಚೀನಾ ಹುಲಿ, ದಕ್ಷಿಣ ಚೀನಾ ಹುಲಿ, ಮಲಯದ ಹುಲಿ ಮತ್ತು ಸುಮಾತ್ರದ ಹುಲಿ ಇವು ಹುಲಿಗಳ ಇತರ ಉಪಪ್ರಭೇದಗಳಾಗಿವೆ. ಇವುಗಳಲ್ಲೆಲ್ಲ ಬಂಗಾಳದ ಹುಲಿಗಳದ್ದೇ ಅತ್ಯಧಿಕ ಸಂಖ್ಯೆ. ಈ ಹುಲಿಗಳ ಬಗ್ಗೆ ಹೆಚ್ಚೇನೂ ಹೇಳಬೇಕಾಗಿಯೇ ಇಲ್ಲ. ಏಕೆಂದರೆ ಎಲ್ಲರಿಗೂ ಚಿರಪರಿಚಿತವಾದ ಪ್ರಾಣಿಗಳಿವು.
ಇನ್ನು ಗಾತ್ರದಲ್ಲಿ ಎರಡನೇ ಸ್ಥಾನದಲ್ಲಿರುವ ಸಿಂಹಗಳು ಇಂದು ನಮ್ಮ ದೇಶದಲ್ಲಿ ಕೇವಲ ಗುಜರಾತಿನ ಗಿರ್ ಸಂರಕ್ಷಿತ ಪ್ರದೇಶಕ್ಕೆ ಸೀಮಿತವಾಗಿವೆ. ಆದರೆ ಸಿಂಹಗಳು ಸಹ ಎಲ್ಲರಿಗೂ ಚಿರಪರಿಚಿತವಾದ ಜೀವಿಗಳೇ ಆಗಿವೆ. ಎಲ್ಲ ದೊಡ್ಡ ಬೆಕ್ಕುಗಳ ಪೈಕಿ ಹೈಯಾಯ್ಡ್ ಭಾಗವು ಅತಿಹೆಚ್ಚು ಉದ್ದವಾಗಿರುವುದು ಸಿಂಹಕ್ಕೇ. ಹಾಗಾಗಿ ಸಿಂಹದ ಘರ್ಜನೆ ಅತಿಹೆಚ್ಚು ದೂರದವರೆಗೆ, ಅಂದರೆ ಸುಮಾರು ಐದು ಮೈಲುಗಳವರೆಗೆ ಕೇಳುತ್ತದೆ. ಅಲ್ಲದೆ ಸಿಂಹಗಳು ದಟ್ಟವಾದ ಕಾಡುಗಳಲ್ಲಿರದೆ ಬಯಲುಪ್ರದೇಶಗಳಲ್ಲಿ ವಾಸಿಸುವುದರಿಂದ ಅವುಗಳ ಘರ್ಜನೆ ಇನ್ನಷ್ಟು ಹೆಚ್ಚುದೂರಕ್ಕೆ ಕೇಳಿಸುತ್ತದೆ. ನಮ್ಮ ದೇಶದಲ್ಲಲ್ಲದೆ ಆಫ್ರಿಕಾದಲ್ಲಿ ಕೂಡ ಸಿಂಹಗಳಿವೆ. ಪುರಾತನ ಕಾಲದಿಂದಲೂ ಶೌರ್ಯಕ್ಕೆ ಇನ್ನೊಂದು ಅನ್ವರ್ಥನಾಮವಾಗಿ ಸಿಂಹವನ್ನು ಹೆಸರಿಸಲಾಗುತ್ತಿದೆ. ವಾಸ್ತವವಾಗಿ ಗುಂಪಿನಲ್ಲೇ ಬೇಟೆಯಾಡುವ ಸಿಂಹಗಳು ದಿನದ ಹೆಚ್ಚಿನ ಕಾಲವನ್ನು ಮಲಗಿಯೇ ಕಳೆಯುತ್ತವೆ. ಅದೇನೇ ಆಗಿದ್ದರೂ ಸಿಂಹ ಎಲ್ಲರಿಗೂ ಚಿರಪರಿಚಿತವಾದ ಪ್ರಾಣಿಯೇ ಸರಿ.
ಇನ್ನು ದೊಡ್ಡ ಬೆಕ್ಕುಗಳಲ್ಲೆಲ್ಲ ಅತ್ಯಂತ ಅಧಿಕ ಸಂಖ್ಯೆಯಲ್ಲಿರುವ ಬೆಕ್ಕೆಂದರೆ ಚಿರತೆ. ಇದಕ್ಕೆ ಕಾರಣ ಪರಿಸರಕ್ಕೆ ಹೊಂದಿಕೊಳ್ಳಬಲ್ಲ ಅವುಗಳ ಸಾಮರ್ಥ್ಯ. ಚಿರತೆಗಳು ದಟ್ಟಕಾಡು, ಕುರುಚಲು ಕಾಡು, ಎಲೆ ಉದುರಿಸುವ ಕಾಡು ಸೇರಿದಂತೆ ಯಾವ ಬಗೆಯ ಕಾಡುಗಳಲ್ಲಾದರೂ ವಾಸಿಸಬಲ್ಲವು. ಅಲ್ಲದೆ ಹುಲಿ ಮತ್ತು ಸಿಂಹಗಳಿಗಿ೦ತ ಚಿಕ್ಕವಾದ ಕಾರಣ ಅವು ಏನನ್ನಾದರೂ ತಿಂದು ಬದುಕಬಲ್ಲವು. ಹುಲಿಗಳಿಗೆ ದೊಡ್ಡ ಬೇಟೆಯೇ ಬೇಕು. ಆದರೆ ಚಿರತೆಗಳು ಚಿಕ್ಕಪುಟ್ಟ ಕಾಡುಕೋಳಿ, ಕಬ್ಬೆಕ್ಕು, ನಾಯಿ ಇತ್ಯಾದಿಗಳನ್ನು ಸಹ ತಿಂದು ಬದುಕಬಲ್ಲವು. ಅಲ್ಲದೆ ಅವಕ್ಕೆ ಮರ ಹತ್ತುವ ವಿದ್ಯೆಯೂ ಕರಗತ. ಈ ಕಾರಣಗಳಿಂದ ಚಿರತೆಗಳು ಗರಿಷ್ಠ ಸಂಖ್ಯೆಯಲ್ಲಿ ಉಳಿದುಕೊಂಡಿವೆ.
ಇನ್ನು ಜಾಗ್ವಾರ್ ಮತ್ತು ಹಿಮಚಿರತೆಗಳು ನಮ್ಮಲ್ಲಿ ಹೆಚ್ಚಿನವರಿಗೆ ಪರಿಚಿತವಲ್ಲ. ಏಕೆಂದರೆ ಈ ಬೆಕ್ಕುಗಳು ನಮ್ಮ ಕಡೆ ಇಲ್ಲ. ಹಿಮಚಿರತೆಗಳು ಹಿಮಾಲಯದ ಕಾಡುಗಳಲ್ಲಿ ಕಂಡುಬ೦ದರೆ ಜಾಗ್ವಾರ್ಗಳು ದಕ್ಷಿಣ ಅಮೆರಿಕದ ದಟ್ಟವಾದ ಮಳೆಕಾಡುಗಳಲ್ಲಿ ಕಂಡುಬರುತ್ತವೆ. ಜಾಗ್ವಾರ್ಗಳು ಅತ್ಯಂತ ಧೈರ್ಯಶಾಲಿ ಬೆಕ್ಕುಗಳು. ಇವು ನೋಡಲು ನಮ್ಮ ಚಿರತೆಗಳಂತೆಯೇ ಇರುತ್ತವೆ. ಆದರೆ ಇವುಗಳ ಮೈಮೇಲಿನ ಮಚ್ಚೆಗಳನ್ನು ಸೂಕ್ಷ್ಮವಾಗಿ ಗಮನಿಸಿದಾಗ ಚಿರತೆಗಳಿಗೂ ಇವಕ್ಕೂ ಇರುವ ವ್ಯತ್ಯಾಸ ಗೊತ್ತಾಗುತ್ತದೆ. ಇವುಗಳ ಮಚ್ಚೆಗಳು ದಪ್ಪವಾಗಿರುತ್ತವೆ ಮತ್ತು ಆ ಮಚ್ಚೆಗಳ ನಡುವೆ ಒಂದು ಕಪ್ಪುಚುಕ್ಕೆ ಇರುತ್ತದೆ. ಜಾಗ್ವಾರ್ಗಳು ನುರಿತ ಈಜುಗಾರರು. ಅಮೆಜೋನಿಯಾ ಅರಣ್ಯಗಳಲ್ಲಿ ವಾಸಿಸುವ ಇವು ಅಲ್ಲಿ ಕ್ಯಾಪಿಬಾರಾ, ಟಾಪಿರ್ ಮತ್ತು ಕೇಮ್ಯಾನ್ಗಳನ್ನು ಬೇಟೆಯಾಡುತ್ತದೆ. ಕೇಮ್ಯಾನ್ ಎಂದರೆ ಒಂದು ಜಾತಿಯ ಮೊಸಳೆ! ಮೊಸಳೆಯೇ ಎಂಥ ಉಗ್ರ ಬೇಟೆಗಾರ ಎಂಬುದು ಎಲ್ಲರಿಗೂ ಗೊತ್ತು. ಅದನ್ನೇ ಬೇಟೆಯಾಡುತ್ತದೆ ಎಂದರೆ ಜಾಗ್ವಾರ್ ಅದೆಂಥ ಬೇಟೆಗಾರನಾಗಿರಬೇಕು ಎಂದು ಊಹಿಸಿ. ಜೊತೆಗೆ ಅಲ್ಲಿನ ಪ್ರಸಿದ್ಧ ಮಹಾಸರ್ಪಗಳಾದ ಅನಕೊಂಡಾಗಳನ್ನೂ ಜಾಗ್ವಾರ್ಗಳು ಬೇಟೆಯಾಡಿ ಕೊಂದ ಉದಾಹರಣೆಗಳಿವೆ! ಇವುಗಳ ಬೇಟೆಯಾಡುವ ಶೈಲಿ ಪ್ರಾಣಿಲೋಕದಲ್ಲೇ ವಿಶಿಷ್ಟ ಎನ್ನಬಹುದು. ಹೇಗೆಂದರೆ ಅವು ಬೇಟೆಯ ತಲೆಯನ್ನೇ ಕಚ್ಚಿ ಅವುಗಳ ತಲೆಬುರುಡೆಯನ್ನೇ ಸೀಳಿ ಕೊಲ್ಲುತ್ತವೆ! ಜೊತೆಗೆ ಇವು ನೀರಿಗೆ ಹೆದರುವುದಿಲ್ಲವಾದ್ದರಿಂದ ಮೊಸಳೆ ಮತ್ತು ಅನಕೊಂಡಗಳ೦ಥ ಬೇಟೆಗಾರರನ್ನು ನೀರಿನಲ್ಲೂ ಹಿಡಿದು ಕೊಲ್ಲಬಲ್ಲದು.
ಹಿಮಚಿರತೆಯನ್ನು ನೋಡುವ ಸೌಭಾಗ್ಯ ನಿಮಗೆ ಸಿಕ್ಕಿದರೆ ನೀವು ಅತ್ಯಂತ ಅದೃಷ್ಟಶಾಲಿ ಎಂಬುದರಲ್ಲಿ ಅನುಮಾನವೇ ಇಲ್ಲ. ಏಕೆಂದರೆ ಅವುಗಳ ದರ್ಶನಕ್ಕಾಗಿ ಅನೇಕ ದಿನಗಳವರೆಗೆ ಕಾದು ಹತಾಶರಾಗಿ ಮರಳಿದ ಸಂಶೋಧಕರ ಪಟ್ಟಿ ದೊಡ್ಡದಿದೆ. ಅತ್ಯಂತ ಸಂಕೋಚ ಸ್ವಭಾವದ ಈ ಪ್ರಾಣಿಗಳು ಕಣ್ಣಿಗೆ ಬೀಳುವುದೇ ಅಪರೂಪ. ಅಲ್ಲದೆ ಅವುಗಳ ಸುಂದರವಾದ ಮೈಚರ್ಮಕ್ಕಾಗಿ ಅವುಗಳನ್ನು ಕೊಲ್ಲುವುದು ಹೆಚ್ಚಾಗಿದ್ದರಿಂದ ಅವು ಅಲ್ಪಸಂಖ್ಯಾತವಾಗಿವೆ. ಇಂದು ಸರ್ಕಾರದ ರಕ್ಷಣೆಯಲ್ಲಿ ಅವು ಬದುಕುತ್ತಿವೆ. ಚಿರತೆಗಳಿಗಿಂತ ಸ್ವಲ್ಪ ಚಿಕ್ಕದಾಗಿರುವ ಈ ಹಿಮಚಿರತೆಗಳ ಮೈಮೇಲೆ ದೊಡ್ಡದೊಡ್ಡ ಮಚ್ಚೆಗಳಿರುತ್ತವೆ. ಇವುಗಳ ಹೈಯಾಯ್ಡ್ ಮೂಳೆಗಳು ಸಹ ದೊಡ್ಡ ಬೆಕ್ಕುಗಳ ಹೈಯಾಯ್ಡ್ ಮೂಳೆಗಳಂತೆಯೇ ಇದ್ದರೂ ಕೂಡ ಗಂಟಲಿನ ಇತರ ರಚನೆಗಳು ದೊಡ್ಡ ಬೆಕ್ಕುಗಳಂತಿಲ್ಲದಿರುವುದರಿ೦ದ ಇವು ಘರ್ಜಿಸಲಾರವು. ಅನೇಕ ಲಕ್ಷ ವರ್ಷಗಳ ಹಿಂದೆಯೇ ಹಿಮಚಿರತೆ ಮತ್ತು ಹುಲಿಗಳು ವಿಕಾಸದ ಹಾದಿಯಲ್ಲಿ ಕವಲೊಡೆದವು. ಒಟ್ಟಾರೆ ಘರ್ಜಿಸುವ ಸಾಮರ್ಥ್ಯವಿಲ್ಲದಿದ್ದರೂ ಬೇರೆ ಲಕ್ಷಣಗಳು ಮತ್ತು ದೇಹಗಾತ್ರದ ಕಾರಣ ಇವುಗಳನ್ನು ದೊಡ್ಡಬೆಕ್ಕುಗಳು ಎಂದೇ ಕರೆಯಲಾಗುತ್ತದೆ.
ಇನ್ನು ಅತಿವೇಗದ ಓಟಗಾರ ಎಂಬ ಹೆಗ್ಗಳಿಕೆ ಪಡೆದಿರುವ ಬೆಕ್ಕು ಚೀತಾ. ಮೊದಲು ಏಷ್ಯಾ ಮತ್ತು ಆಫ್ರಿಕಗಳಲ್ಲಿ ಅಸಂಖ್ಯವಾಗಿದ್ದ ಚೀತಾಗಳು ನಮ್ಮ ದಏಶದಲ್ಲೂ ಧಾರಾಳ ಸಂಖ್ಯೆಯಲ್ಲಿದ್ದವು. ಆದರೆ ಇಂದು ಚೀತಾಗಳು ನಮ್ಮ ದೇಶದಲ್ಲಿ ಇಲ್ಲ. ಆಫ್ರಿಕಾದಲ್ಲಿ ಮಾತ್ರ ಇವೆ. ಗಂಟೆಗೆ ನೂರಾಹತ್ತು ಕಿಲೋಮೀಟರ್ಗಳ ಮಿಂಚಿನ ವೇಗವನ್ನು ತಲುಪಬಲ್ಲ ಸಾಮರ್ಥ್ಯ ಇವಕ್ಕಿದೆ. ಆದರೆ ಇಷ್ಟು ವೇಗದ ಓಟವನ್ನು ಬಹಳಕಾಲ ಕಾಯ್ದುಕೊಳ್ಳುವ ಸಾಮರ್ಥ್ಯ ಮಾತ್ರ ಇವಕ್ಕಿಲ್ಲ. ಗರಿಷ್ಠ ಅರ್ಧ ಅಥವಾ ಒಂದು ಕಿಲೋಮೀಟರ್ ದೂರವನ್ನು ಮಾತ್ರ ಇಷ್ಟು ವೇಗದಲ್ಲಿ ಓಡಬಲ್ಲದು. ಆಮೇಲೆ ಸುಸ್ತಾಗಿ ನಿಂತುಬಿಡುತ್ತದೆ. ಹಾಗಾಗಿ ಅಷ್ಟು ದೂರದೊಳಗೆ ಬೇಟೆಯನ್ನು ಹಿಡಿಯಲು ಸಾಧ್ಯವಾದರೆ ಮಾತ್ರ ಅವಕ್ಕೆ ಊಟ. ಇಲ್ಲವಾದರೆ ಇಲ್ಲ. ಆದರೂ ಚೀತಾದ ಯಶಸ್ಸಿನ ಪ್ರಮಾಣ ಬೇರೆ ದೊಡ್ಡ ಬೆಕ್ಕುಗಳಿಗೆ ಹೋಲಿಸಿದರೆ ತುಂಬಾ ಜಾಸ್ತಿ. ಹುಲಿ, ಚಿರತೆ, ಸಿಂಹಗಳ ಬೇಟೆಯ ಯಶಸ್ಸಿನ ಪ್ರಮಾಣ ಶೇಕಡಾ ಹತ್ತು ಮೀರುವುದಿಲ್ಲ, ಆದರೆ ಚೀತಾದ ಯಶಸ್ಸಿನ ಪ್ರಮಾಣ ಶೇಕಡಾ ಐವತ್ತನ್ನು ತಲುಪುತ್ತದೆ. ಅಂದರೆ ಅದು ಬೇಟೆಯನ್ನು ಹಿಡಿಯಲು ಬೆನ್ನಟ್ಟಿದ ಪ್ರತಿ ಎರಡು ಪ್ರಯತ್ನಗಳ ಪೈಕಿ ಒಂದರಲ್ಲಿ ಯಶಸ್ವಿಯಾಗುತ್ತದೆ. ಆದರೆ ಎಷ್ಟೋ ಸಲ ಇದು ಕೊಂದ ಬೇಟೆಯನ್ನು ಸಿಂಹಗಳು ಅಥವಾ ಕಿರುಬಗಳು ವಶಪಡಿಸಿಕೊಳ್ಳುತ್ತವೆ. ದೈಹಿಕವಾಗಿ ಅಷ್ಟೊಂದು ಬಲಿಷ್ಠವಲ್ಲದ ಇವು ಯಾವುದೇ ಪ್ರತಿರೋಧ ಒಡ್ಡದೆ ಸುಲಭವಾಗಿ ತಮ್ಮ ಬೇಟೆಯನ್ನು ಬಿಟ್ಟುಕೊಡುತ್ತವೆ.
ಉತ್ತರ ಮತ್ತು ದಕ್ಷಿಣ ಅಮೆರಿಕಗಳಲ್ಲಿ ಪರ್ವತ ಸಿಂಹ ಎಂದು ಕರೆಯಲ್ಪಡುವ ಬೆಕ್ಕೊಂದಿದೆ. ನೋಡಲು ಕೇಸರವಿಲ್ಲದ ಸಿಂಹದ೦ತೆ ಕಾಣುವ ಈ ಬೆಕ್ಕುಗಳಿಗೆ ಕಾಗ್ವಾರ್, ಪ್ಯೂಮಾ, ಪ್ಯಾಂಥರ್ ಎಂಬೆಲ್ಲ ಹೆಸರುಗಳಿವೆ. ಆದರೆ ಪ್ಯಾಂಥರ್ ಎಂಬ ಹೆಸರನ್ನು ಚಿರತೆಗಳಿಗೂ ಬಳಸಲಾಗುತ್ತದೆ. ಅದೇನೇ ಆಗಿದ್ದರೂ ಪ್ಯೂಮಾಗಳು ಅಮೆರಿಕದ ಬಲಿಷ್ಠ ಬೇಟೆಗಾರರು ಎಂಬುದರಲ್ಲಿ ಅನುಮಾನವಿಲ್ಲ. ನಮ್ಮ ಚಿರತೆಗಳಷ್ಟೇ ಅಥವಾ ಅವಕ್ಕಿಂತ ಸ್ವಲ್ಪ ದೊಡ್ಡದಿದ್ದರೂ ಈ ಬೆಕ್ಕುಗಳು ದೈಹಿಕವಾಗಿ ದೊಡ್ಡ ಬೆಕ್ಕುಗಳಿಗಿಂತ ಚಿಕ್ಕ ಬೆಕ್ಕುಗಳನ್ನೇ ಹೋಲುತ್ತವೆ. ಆದ್ದರಿಂದ ಇವು ದೊಡ್ಡ ಬೆಕ್ಕುಗಳ ಉಪಕುಟುಂಬವಾದ ಪ್ಯಾಂಥರಿನೇಗೆ ಸೇರುವುದಿಲ್ಲ. ಬದಲಾಗಿ ಸಣ್ಣ ಬೆಕ್ಕುಗಳ ಉಪಕುಟುಂಬವಾದ ಫೆಲಿನೇಗೆ ಸೇರುತ್ತವೆ. ಇವು ಸಣ್ಣ ಬೆಕ್ಕುಗಳಲ್ಲೆಲ್ಲ ಅತ್ಯಂತ ದೊಡ್ಡವು ಎಂದು ಹೆಸರಾಗಿವೆ. ಜೊತೆಗೆ ಪ್ರಾಣಿಗಳಲ್ಲೆಲ್ಲ ಅತಿಹೆಚ್ಚು ಹೆಸರುಗಳನ್ನು ಹೊಂದಿದ ಪ್ರಾಣಿ ಎಂದು ಗಿನ್ನೆಸ್ ಬುಕ್ನಲ್ಲಿ ದಾಖಲೆಗೆ ಸೇರಿವೆ. ಆಂಗ್ಲಭಾಷೆಯೊ೦ದರಲ್ಲೇ ಇದಕ್ಕೆ ಸುಮಾರು ನಲವತ್ತು ಹೆಸರುಗಳಿವೆ.
ಸಣ್ಣಬೆಕ್ಕುಗಳಲ್ಲಿ ಪ್ಯೂಮಾ ಅತಿ ದೊಡ್ಡದೆನಿಸಿಕೊಂಡಿದ್ದರೆ ದೊಡ್ಡಬೆಕ್ಕುಗಳಲ್ಲಿ ಅತಿ ಸಣ್ಣದೆನಿಸಿಕೊಂಡಿರುವ ಬೆಕ್ಕು ನಮ್ಮ ದೇಶದಲ್ಲೇ ಇದೆ ಗೊತ್ತೆ? ಕ್ಲೌಡೆಡ್ ಲೆಪರ್ಡ್ (ಮೋಡ ಚಿರತೆ) ಎಂಬ ಈ ಬೆಕ್ಕು ನಮ್ಮ ದೇಶದ ಈಶಾನ್ಯದ ಕಾಡುಗಳಲ್ಲಿ ವಾಸಿಸುತ್ತದೆ. ಪ್ರಢ ಗಂಡುಗಳು ಇಪ್ಪತ್ತೆöÊದು ಕಿಲೋಗ್ರಾಂ ಮೀರುವುದಿಲ್ಲ. ಇದರ ಮೈಮೇಲೆಲ್ಲ ದೊಡ್ಡ ಮಚ್ಚೆಗಳಿರುವುದರಿಂದ ಮೋಡಚಿರತೆ ಎಂಬ ಹೆಸರು ಬಂದಿದೆ. ಇವುಗಳಲ್ಲಿ ಇತ್ತೀಚೆಗೆ ಎರಡು ಪ್ರಭೇದಗಳನ್ನು ಗುರ್ತಿಸಲಾಗಿದೆ. ನಮ್ಮ ದೇಶದ ಮೋಡಚಿರತೆಗಳ ಜೊತೆಗೆ ಸುಮಾತ್ರದಲ್ಲಿರುವ ಮೋಡಚಿರತೆಗಳನ್ನೂ ಮೊದಲು ಒಂದೇ ಪ್ರಭೇದವೆಂದು ಪರಿಗಣಿಸಲಾಗಿತ್ತು. ಆದರೆ ಈಗ ಅವುಗಳನ್ನು ಸುಂಡಾ ಕ್ಲೌಡೆಡ್ ಲೆಪರ್ಡ್ಗಳನ್ನು (ಸುಂಡಾ ಮೋಡಚಿರತೆ) ಪ್ರತ್ಯೇಕ ಪ್ರಭೇದಗಳೆಂದು ಗುರುತಿಸಲಾಗಿದೆ. ನೋಡಲು ಎರಡೂ ಪ್ರಭೇದಗಳು ಒಂದೇ ರೀತಿ ಕಂಡರೂ ಅವುಗಳ ಡಿ.ಎನ್.ಎ ವಿನ್ಯಾಸದಲ್ಲಿ ಸುಮಾರು ನಲವತ್ತಕ್ಕೂ ಹೆಚ್ಚು ವ್ಯತ್ಯಾಸಗಳಿರುವುದು ಕಂಡುಬ೦ದಿದ್ದರಿ೦ದ ಇವುಗಳೆರಡನ್ನೂ ಪ್ರತ್ಯೇಕ ಪ್ರಭೇದಗಳೆಂದು ಪರಿಗಣಿಸುವುದು ಅನಿವಾರ್ಯವಾಯಿತು.
ಮೋಡ ಚಿರತೆಗಳು ಸಹ ಅವುಗಳ ಸುಂದರವಾದ ಚರ್ಮಕ್ಕಾಗಿ ಬೇಟೆಗೆ ಬಲಿಯಾಗುತ್ತಿವೆ. ಅವುಗಳ ಚರ್ಮದಿಂದ ಮಾಡಿದ ಕೋಟಿಗೆ ಕೋಟಿಗಳಲ್ಲೇ ಬೆಲೆ! ಆದರೆ ಈಗ ಅವು ಸಂರಕ್ಷಿತ ಪ್ರಭೇದವಾಗಿರುವುದರಿಂದ ರಕ್ಷಣೆಯ ಗೂಡಿನಲ್ಲಿ ಸ್ವಲ್ಪ ಉಸಿರಾಡುತ್ತಿವೆ. ಇವುಗಳ ಸಂಖ್ಯೆ ಹತ್ತುಸಾವಿರದ ಆಸುಪಾಸಿನಲ್ಲಿ ಇರಬಹುದೆಂದು ಅಂದಾಜಿಸಲಾಗಿದೆ.
ಇದಿಷ್ಟು ದೊಡ್ಡ ಬೆಕ್ಕುಗಳ ಕಥೆಯಾದರೆ ಇನ್ನು ಸಣ್ಣಬೆಕ್ಕುಗಳಲ್ಲಿ ಸಹ ಅಪಾರ ವೈವಿಧ್ಯಗಳಿವೆ. ಮನೆಬೆಕ್ಕು (ಡೊಮೆಸ್ಟಿಕ್ ಕ್ಯಾಟ್), ಫಿಶಿಂಗ್ ಕ್ಯಾಟ್, ಲಿಂಕ್ಸ್, ಕ್ಯಾರಕಲ್, ಸರ್ವಾಲ್, ಮಾರ್ಗೇ, ಒಸೆಲಾಟ್, ಲೆಪರ್ಡ್ಕ್ಯಾಟ್, ಜಂಗಲ್ಕ್ಯಾಟ್ ಇತ್ಯಾದಿ ಪ್ರಭೇದಗಳೆಲ್ಲ ಚಿಕ್ಕಬೆಕ್ಕುಗಳೆಂದು ಪರಿಗಣಿಸಲ್ಪಟ್ಟಿವೆ. ಆದರೆ ಬೆಕ್ಕು ಎಂಬ ನಾಮಧೇಯ ಹೊಂದಿರುವ ಇನ್ನೂ ಕೆಲವು ಪ್ರಾಣಿಗಳಿವೆ. ಆದರೆ ಅವು ಬೆಕ್ಕಿನ ಕುಟುಂಬಕ್ಕೆ ಸೇರುವುದಿಲ್ಲ. ಕರಡಿ ಬೆಕ್ಕು (ಬಿಂಟುರಾ೦ಗ್), ಪುನುಗುಬೆಕ್ಕು (ಸಿವೆಟ್) ಇತ್ಯಾದಿಗಳು ಹೆಸರಿನಲ್ಲಿ ಬೆಕ್ಕು ಎಂಬ ಪದವನ್ನು ಹೊತ್ತುಕೊಂಡಿದ್ದರೂ ಬೆಕ್ಕುಗಳ ಕುಟುಂಬಕ್ಕೆ ಸೇರಿಲ್ಲ.
ಸಣ್ಣಬೆಕ್ಕುಗಳಲ್ಲಿ ಲಿಂಕ್ಸ್ಗಳ ಜೀನಸ್ ಅತ್ಯಂತ ಪ್ರಸಿದ್ಧವಾದದ್ದು. ಇದರಲ್ಲಿ ನಾಲ್ಕು ಪ್ರಭೇದಗಳಿವೆ. ಯೂರೇಷಿಯನ್ ಲಿಂಕ್ಸ್, ಐಬೀರಿಯನ್ ಲಿಂಕ್ಸ್, ಕೆನಡಿಯನ್ ಲಿಂಕ್ಸ್ ಮತ್ತು ಬಾಬ್ಕ್ಯಾಟ್ ಎಂಬ ನಾಲ್ಕು ಪ್ರಭೇದಗಳು ಲಿಂಕ್ಸ್ ಎಂಬ ಜೀನಸ್ನಲ್ಲಿ ಸೇರಿವೆ. ಇವಕ್ಕೆಲ್ಲ ಕಿವಿಗಳ ಮೇಲೆ ಇರುವ ಕೂದಲುಗಳ ಗುಚ್ಛ ಇವನ್ನು ಬೇರೆ ಬೆಕ್ಕುಗಳಿಂದ ಪ್ರತ್ಯೇಕಿಸುತ್ತದೆ. ಇವುಗಳೆಲ್ಲ ನುರಿತ ಬೇಟೆಗಾರರಾಗಿದ್ದು ಮೇಲ್ನೋಟಕ್ಕೆ ಒಂದನ್ನೊ೦ದು ಹೋಲುತ್ತವೆಯಾದರೂ ಇವುಗಳಲ್ಲಿ ವ್ಯತ್ಯಾಸಗಳಿವೆ. ಕೆನಡಿಯನ್ ಲಿಂಕ್ಸ್ ಕೆನಡಾದಲ್ಲಿ ಕಂಡುಬರುತ್ತದೆ. ಕೆನಡಾ ದೇಶದ ಹೆಚ್ಚಿನ ಪ್ರದೇಶಗಳು ಶೀತಲ ಪ್ರದೇಶಗಳಾಗಿದ್ದರಿಂದ ಇಲ್ಲಿ ಈ ಬೆಕ್ಕುಗಳಿಗೆ ಮೈಮೇಲೆ ದಪ್ಪನೆಯ ತುಪ್ಪಳ ಇರುತ್ತದೆ. ಇದರಿಂದಾಗಿ ಇವು ಚಳಿಯಿಂದ ರಕ್ಷಣೆ ಪಡೆಯಲು ಸಾಧ್ಯವಾಗುತ್ತದೆ. ಎಲ್ಲ ಬಗೆಯ ಬೆಕ್ಕುಗಳಂತೆಯೇ ಇವಕ್ಕೂ ತೀಕ್ಷ÷್ಣವಾದ ದೃಷ್ಟಿಶಕ್ತಿ ಮತ್ತು ಶ್ರವಣಶಕ್ತಿ ಇದ್ದು, ತಮ್ಮ ಬೇಟೆಯನ್ನು ಕಂಡುಹಿಡಿಯಲು ಈ ಶಕ್ತಿಗಳು ಅವಕ್ಕೆ ನೆರವಾಗುತ್ತವೆ. ದಂಶಕವರ್ಗದ ಚಿಕ್ಕ ಪ್ರಾಣಿಗಳು ಮತ್ತು ಹಕ್ಕಿಗಳು ಇವುಗಳ ಮುಖ್ಯ ಆಹಾರ. ಮರಿಜಿಂಕೆಗಳನ್ನು ಸಹ ಇವು ಬೇಟೆಯಾಡಬಲ್ಲವು. ಅಲ್ಲದೆ ಸತ್ತ ಪ್ರಾಣಿಗಳನ್ನು ತಿನ್ನಲು ಸಹ ಇವು ಹಿಂದೆಮು೦ದೆ ನೋಡುವುದಿಲ್ಲ.
ಐಬೀರಿಯನ್ ಲಿಂಕ್ಸ್ಗಳು ಬಹುತೇಕ ಮೊಲಗಳನ್ನೇ ಬೇಟೆಯಾಡುತ್ತವೆ. ಇತ್ತೀಚಿನ ದಿನಗಳಲ್ಲಿ ಮೊಲಗಳ ಸಂತತಿ ಕ್ಷೀಣವಾಗುತ್ತಿದ್ದು, ಅದರ ಪರಿಣಾಮ ಲಿಂಕ್ಸ್ಗಳ ಮೇಲೂ ಆಗುತ್ತಿದೆ. ಜೊತೆಗೆ ಇವುಗಳ ಚರ್ಮದಿಂದ ಕೋಟುಗಳನ್ನು ತಯಾರಿಸುವುದಕ್ಕಾಗಿ ಇವುಗಳನ್ನು ಬೇಟೆಯಾಡುತ್ತಿದ್ದರು. ಇಂದಿನ ದಿನಗಳಲ್ಲಿ ಸರ್ಕಾರದ ರಕ್ಷಣೆಯಲ್ಲಿ ಇವು ಉಸಿರಾಡುತ್ತಿವೆ.
ನಮ್ಮ ದೇಶದ ಪ್ರಸಿದ್ಧ ಸಣ್ಣಬೆಕ್ಕು ಎಂದರೆ ಚಿರತೆಬೆಕ್ಕು (ಲೆಪರ್ಡ್ ಕ್ಯಾಟ್). ಮನೆಬೆಕ್ಕುಗಳಿಗಿಂತ ಸ್ವಲ್ಪ ದೊಡ್ಡದಿರುವ ಇದು ಮೈಮೇಲಿನ ಚಿರತೆಗಳಂಥ ಚಿತ್ತಾರದ ಕಾರಣ ಚಿರತೆಬೆಕ್ಕು ಎಂಬ ಹೆಸರು ಪಡೆದಿದೆ. ಈ ಬೆಕ್ಕಿನ ಮುಖ್ಯ ಆಹಾರ ಇಲಿ ಮತ್ತು ಇತರ ದಂಶಕಗಳು. ಇದರ ಜೊತೆಗೆ ಸಣ್ಣಪುಟ್ಟ ಹಕ್ಕಿಗಳು, ಹಲ್ಲಿಗಳು ಹಾಗೂ ಕಪ್ಪೆಗಳನ್ನು ಸಹ ತಿನ್ನುತ್ತವೆ. ಬೇರೆ ಬೆಕ್ಕುಗಳಂತೆಯೇ ಇವನ್ನೂ ಚರ್ಮಕ್ಕಾಗಿ ಬೇಟೆಯಾಡುತ್ತಾರೆ. ನಮ್ಮ ದೇಶದಲ್ಲಿ ಮಾತ್ರವಲ್ಲದೆ ಸೈಬೀರಿಯಾ, ಇಂಡೋನೇಷ್ಯಾ ಮತ್ತು ಫಿಲಿಪ್ಪೀನ್ಸ್ ಮತ್ತಿತರ ದೇಶಗಳಲ್ಲೂ ಇವು ಕಂಡುಬರುತ್ತವೆ. ಬೇರೆಬೇರೆ ದೇಶಗಳಲ್ಲಿ ಕಂಡುಬರುವ ಉಪಪ್ರಭೇದಗಳ ಮೈಬಣ್ಣ ಬೇರೆಬೇರೆಯಾಗಿರುತ್ತದೆ.
ಪಲ್ಲಾಸ್ ಕ್ಯಾಟ್ ಎಂಬ ಇನ್ನೊಂದು ಬೆಕ್ಕು ಸಹ ಮನೆಬೆಕ್ಕಿನ ಗಾತ್ರದ್ದಾಗಿದೆ. ಇದರ ಮೈಮೇಲಿನ ದಪ್ಪನೆಯ ತುಪ್ಪಳದಿಂದಾಗಿ ನೋಡಲು ಇದರ ನಿಜವಾದ ಗಾತ್ರಕ್ಕಿಂತ ದೊಡ್ಡದಾಗಿ ಕಾಣುತ್ತದೆ. ಬೇರೆ ಬೆಕ್ಕುಗಳಿಗೆ ಹೋಲಿಸಿದರೆ ಇದರ ತಲೆ ಚಪ್ಪಟೆಯಾಗಿದೆ. ೧೭೭೬ರಲ್ಲಿ ಮೊದಲಬಾರಿಗೆ ಇದನ್ನು ಹೆಸರಿಸಿದ ಪೀಟರ್ ಸೈಮನ್ ಪಲ್ಲಾಸ್ ಎಂಬ ಜರ್ಮನ್ ಜೀವಶಾಸ್ತçಜ್ಞನ ನೆನಪಿಗಾಗಿ ಈ ಹೆಸರನ್ನು ಇದಕ್ಕೆ ಇಡಲಾಗಿದೆ. ಸಣ್ಣಬೆಕ್ಕುಗಳ ಪೈಕಿ ಬೇಟೆಯಿಂದ ಅತಿಹೆಚ್ಚು ಅಪಾಯಕ್ಕೊಳಗಾಗಿರುವ ಬೆಕ್ಕು ಎಂದು ಇದನ್ನು ಗುರುತಿಸಲಾಗಿದೆ.
ಬೆಕ್ಕುಗಳೆಲ್ಲ ಕಪ್ಪೆ, ಇಲಿ, ಹೆಗ್ಗಣ ಇತ್ಯಾದಿಗಳನ್ನು ಬೇಟೆಯಾಡುವ ಪ್ರಾಣಿಗಳು ಎಂಬ ನಂಬಿಕೆಯನ್ನು ಹುಸಿಗೊಳಿಸುವ ಬೆಕ್ಕೊಂದಿದೆ. ಫಿಶಿಂಗ್ ಕ್ಯಾಟ್ (ಮೀನಿಗಾರ ಬೆಕ್ಕು) ಎಂದೇ ಕರೆಯಲ್ಪಡುವ ಈ ಬೆಕ್ಕು ಹೆಸರೇ ಹೇಳುವಂತೆ ಮೀನುಗಳನ್ನು ಬೇಟೆಯಾಡುತ್ತದೆ. ಇದು ನಿಜಕ್ಕೂ ಬೆಕ್ಕುಗಳಲ್ಲೆಲ್ಲ ವಿಶಿಷ್ಟವಾದ ಜೀವಿಯೇ ಸರಿ. ಏಕೆಂದರೆ ನೆಲದ ಮೇಲೆ ಓಡಾಡುವ ಪ್ರಾಣಿಗಳನ್ನು ಹಿಡಿಯುವುದಕ್ಕೂ ನೀರಿನಲ್ಲಿ ಮೀನುಗಳನ್ನು ಹಿಡಿಯುವುದಕ್ಕೂ ಅಜಗಜಾಂತರ ವ್ಯತ್ಯಾಸಗಳಿವೆ. ನೀರಿನೊಳಗೆ ಎಲ್ಲೆಂದರಲ್ಲಿ ನುಸುಳಿ ಪರಾರಿಯಾಗುವ ಮೀನುಗಳನ್ನು ಜಾರದಂತೆ ಹಿಡಿಯುವುದು ನಿಜಕ್ಕೂ ಸವಾಲಿನ ಕೆಲಸವೇ ಸರಿ ಅದಕ್ಕೆ ತಕ್ಕಂತೆ ಈ ಬೆಕ್ಕುಗಳ ಪಂಜಗಳು ಮಾರ್ಪಾಡಾಗಿವೆ. ಮೀನೇ ಇವುಗಳ ಪ್ರಧಾನ ಆಹಾರವಾದ್ದರಿಂದ ಇವು ನೀರಿನ ನೆಲೆಗಳ ಬಳಿಯಲ್ಲೇ ವಾಸಿಸುತ್ತವೆ. ಮನೆಬೆಕ್ಕುಗಳ ಎರಡು ಪಟ್ಟು ದೊಡ್ಡದಾದ ಬೆಕ್ಕುಗಳಿವು.
ಬೆಕ್ಕುಗಳು ದೊಡ್ಡವಿರಲಿ ಅಥವಾ ಸಣ್ಣವಿರಲಿ ಪರಿಸರ ಸಮತೋಲನ ನಿರ್ವಹಣೆಯಲ್ಲಿ ಅವುಗಳ ಪಾತ್ರ ಸಣ್ಣದೇನಲ್ಲ. ಹಾಗಾಗಿ ಎಲ್ಲ ಬೆಕ್ಕುಗಳ ಸಂರಕ್ಷಣೆ ನಮ್ಮ ಆದ್ಯ ಕರ್ತವ್ಯವೂ ಹೌದು. ಆದರಿಂದು ದುರದೃಷ್ಟವಶಾತ್ ಮನೆಬೆಕ್ಕುಗಳನ್ನು ಹೊರತುಪಡಿಸಿ ಬೇರೆಲ್ಲ ಬೆಕ್ಕುಗಳು ಅಲ್ಪಸಂಖ್ಯಾತವಾಗಿದ್ದು ಅಳಿವಿನಂಚಿಗೆ ತಲುಪಿವೆ. ಅವುಗಳ ವಂಶ ನಿರ್ವಂಶವಾಗದಿರಲಿ. ಅವುಗಳ ಘರ್ಜನೆ ನಿರಂತರವಾಗಿರಲಿ.